Aprovohet padia e KDI-së – Shfuqizohet kufizimi në kohë i të drejtës për kompensimin e udhëtimeve zyrtare
Gjykata Supreme e Republikës së Kosovës ka marrë një vendim me rëndësi të veçantë për mbrojtjen e të drejtave financiare të zyrtarëve publikë, duke aprovuar si të themeltë kërkesëpadinë e Institutit Demokratik të Kosovës, të paraqitur kundër Qeverisë së Kosovës.
Me këtë vendim, Supremja ka shpallur të paligjshëm dhe ka shfuqizuar neni 6 paragrafi 6 i Rregullores (QRK) nr. 06/2023 për Kompensimin për Udhëtime Zyrtare dhe Shpenzime të Përfaqësimit.
Objekti i padisë dhe rrethanat e rastit
Instituti Demokratik i Kosovës kishte parashtruar padi për shfuqizimin e pjesshëm të aktit nënligjor normativ, duke kontestuar kufizimin njëmujor të së drejtës për kompensim të shpenzimeve të udhëtimeve zyrtare.
KDI, në muajin korrik 2025, kishte pranuar ankesa nga një grup i ushtarëve të Forcës së Sigurisë së Kosovës, të cilët kishin raportuar shkelje të Ligjit Nr. 08/L-196 për Pagat në Sektorin Publik, lidhur me moskompensimin e udhëtimeve zyrtare për periudha më të gjata se një muaj.
Kufizimi i vendosur me Rregullore
Neni 6 i Rregullores (QRK) nr. 06/2023 parashihte se shpenzimet e udhëtimit zyrtar nuk mbulohen për periudha më të gjata se një muaj. Ky kufizim krijonte pasoja direkte financiare për zyrtarët publikë që ushtronin detyra zyrtare për periudha të zgjatura jashtë vendbanimit.
Gjykata Supreme konstatoi se një kufizim i tillë nuk është i paraparë me ligj dhe nuk gjen mbështetje në Ligjin për Pagat në Sektorin Publik.
Qëndrimi juridik i Gjykatës Supreme
Pas shqyrtimit të çështjes, Gjykata Supreme vlerësoi se kërkesëpadia e KDI-së është e bazuar dhe se dispozita e kontestuar bie ndesh me legjislacionin në fuqi.
Ligji për Pagat në Sektorin Publik garanton qartë të drejtën e zyrtarëve publikë për kompensim të shpenzimeve të udhëtimeve zyrtare, pa paraparë asnjë kufizim kohor. Në këtë kuptim, e drejta për kompensim përbën një të drejtë materiale të garantuar me ligj.
Kufijtë e kompetencave të Qeverisë
Gjykata theksoi se Qeveria e Kosovës është e autorizuar vetëm të rregullojë mënyrën, kushtet dhe procedurën e kompensimit, por jo të kufizojë vetë ekzistencën apo kohëzgjatjen e kësaj të drejte.
Kufizimi njëmujor nuk përbën rregull teknik, por cenon thelbin e së drejtës së garantuar me ligj dhe tejkalon kompetencat e Qeverisë.
Një ndërhyrje e tillë përmes aktit nënligjor është në kundërshtim me parimin e hierarkisë së akteve juridike dhe parimin e ligjshmërisë në administratën publike.
Rëndësia e vendimit për zyrtarët publikë
Ky vendim i Gjykatës Supreme krijon një standard të qartë për mbrojtjen e të drejtave financiare të zyrtarëve publikë dhe përforcon sigurinë juridike në raport me aktet nënligjore.
Shfuqizimi i kufizimit njëmujor parandalon cenimin e të drejtave të punonjësve të sektorit publik dhe obligon institucionet që të veprojnë në përputhje të plotë me ligjin.
