Refuzohet ankesa e Lëvizjes Vetëvendosje lidhur me qendrat e votimit jashtë Kosovës
Paneli Zgjedhor për Ankesa dhe Parashtresa, me vendimin ZP.Anr.3/2025 të datës 30.11.2025, pati pranuar si të bazuar ankesën ZP.A.nr.3/2025 të datës 27.11.2025 të parashtruar nga subjekti politik Lidhja Demokratike e Kosovës. Me këtë vendim u ndryshua vendimi Nr.01/3438-2025 të datës 26.11.2025 i Komisionit Qendror të Zgjedhjeve, në pjesën që lidhet me qendrat e votimit jashtë Kosovës, numrin e vendvotimeve dhe listën e qendrave të votimit.
Si Qendra të Votimit jashtë Kosovës për Zgjedhjet e Parakohshme për Kuvendin e Republikës së Kosovës, të planifikuara për 28 dhjetor 2025, janë caktuar përfaqësitë diplomatike të Republikës së Kosovës apo hapësirat e tyre. PZAP arsyetoi se kjo masë synon të mbrojë integritetin e procesit zgjedhor.
Kundër këtij vendimi Lëvizja Vetëvendosje paraqiti ankesë në Gjykatën Supreme, duke pretenduar se vendimi ishte nxjerrë në kundërshtim me dispozitat ligjore dhe duke kërkuar miratimin e ankesës. Gjykata Supreme, pas shqyrtimit të shkresave, arriti në përfundimin se ankesa është e pabazuar. Me arsyetim, Gjykata mbështeti vlerësimin e PZAP-së se lejimi i qendrave të votimit vetëm brenda hapësirave të përfaqësive diplomatike përbën një masë mbrojtëse për integritetin e votës, pa u bërë pengesë për ushtrimin efektiv të të drejtave të votimit të shtetasve që jetojnë jashtë vendit.
Gjykata theksoi se Republika e Kosovës ka garantuar të drejtën e votës për shtetasit që jetojnë jashtë territorit, ndërkaq ka përcaktuar kushte ligjore për ushtrimin e kësaj të drejte. Në këtë kontekst, vendimi i PZAP-it u vlerësua si i drejtë dhe i ligjshëm, prandaj ankesa e LVV u refuzua.
