Neni 43 – Dënimi me gjobë
Kodi Penal i Republikës së Kosovës
Teksti i Nenit 43
1. Dënimi me gjobë nuk mund të jetë më pak se njëqind (100) Euro evropiane (EURO). Dënimi me gjobë nuk mund të tejkalojë njëzet e pesëmijë (25.000) Euro, ndërsa për veprat penale lidhur me terrorizëm, trafikim me njerëz, krim të organizuar ose veprat penale të kryera me qëllim të përfitimit të dobisë pasurore nuk mund të tejkalojë pesëqind mijë (500.000) Euro.
2. Në aktgjykim caktohet afati i pagesës së dënimit me gjobë. Afati nuk mund të jetë më i shkurtër se pesëmbëdhjetë (15) ditë e as më i gjatë se tre (3) muaj, mirëpo në rrethana të arsyeshme gjykata mund të lejojë që dënimi me gjobë të paguhet me këste për një periudhë që nuk tejkalon dy (2) vjet. Aktgjykimi po ashtu duhet të përcaktojë kur duhet të paguhen këstet dhe duhet të cek se mundësia e pagesës me këste do të revokohet nëse personi i dënuar nuk e paguan këstin me kohë.
3. Nëse personi i dënuar nuk dëshiron ose nuk mund të paguajë gjobën, gjykata mund të zëvendësojë dënimin me gjobë me dënim me burgim. Kur dënimi me gjobë zëvendësohet me dënimin me burgim, njëzet (20) Euro gjobë llogaritet barabartë me një (1) ditë burgim. Dënimi me burgim nuk mund të tejkalojë tre (3) vjet.
4. Nëse personi i dënuar nuk dëshiron ose nuk mund të paguajë gjobën në tërësi, gjykata do ta zëvendësojë pjesën e mbetur të gjobës me dënim me burgim, siç parashihet në paragrafin 3. Nëse personi i dënuar e paguan pjesën e mbetur të gjobës, ekzekutimi i dënimit ndërpritet.
5. Nëse personi i dënuar nuk dëshiron ose nuk mund të paguajë gjobën, gjykata mundet, me pëlqimin e personit të dënuar, në vend të shqiptimit të dënimit me burgim, ta zëvendësojë dënimin me gjobë me urdhër për punë në dobi të përgjithshme. Urdhri për punë në dobi të përgjithshme llogaritet ashtu që tetë (8) orë të punës në dobi të përgjithshme llogariten me njëzet (20) Euro gjobë. Kohëzgjatja e punës në dobi të përgjithshme nuk mund të tejkalojë dyqind e dyzet (240) orë pune.
6. Dënimi me gjobë nuk ekzekutohet pas vdekjes së personit të dënuar.
Shpjegim profesional
Neni 43 përcakton kufijtë minimal dhe maksimal të gjobës, afatin e pagesës dhe mundësitë alternative të ekzekutimit kur personi nuk mund të paguajë. Këto alternativa përfshijnë zëvendësimin me burgim ose urdhër për punë në dobi të përgjithshme, duke siguruar që dënimi të realizohet proporcionalisht me mundësitë e të dënuarit dhe natyrën e veprës penale.
Pikat kryesore
- Gjobat variojnë nga 100 Euro minimum deri 25.000 Euro maksimum, ose 500.000 Euro për veprat e rënda.
- Afati i pagesës: 15 ditë deri 3 muaj, mundësi pagesa me këste deri 2 vjet.
- Zëvendësimi i gjobës me burgim: 20 Euro = 1 ditë burgim, maksimum 3 vjet.
- Zëvendësimi i gjobës me punë në dobi të përgjithshme: 8 orë = 20 Euro, maksimum 240 orë pune.
- Dënimi me gjobë nuk ekzekutohet pas vdekjes.
