Aktvendimi K.Dh.Shk.II.nr. 888/2023 – Vendimi i Papërmbarueshëm
Data: 17.10.2023
Lënda: Refuzimi i ankesës së kreditorit lidhur me urdhrin për përmbarim
Më 25 tetor 2022, kreditori kishte dorëzuar propozim për përmbarim ndaj debitorit, bazuar në një vendim të Komunës së Mitrovicës Jugore të datës 10.10.2022, që i referohej një borxhi tatimor. Më pas, Përmbaruesi Privat kishte lejuar përmbarimin me aktvendimin P.nr.1125/2022 të datës 27.10.2022.
Debitori kishte ushtruar prapësim, duke pretenduar se dokumenti bazë nuk ka natyrën e një titulli ekzekutiv dhe mungojnë tiparet e përmbarueshmërisë, përfshirë edhe mungesën e afatit të përmbushjes vullnetare të detyrimit.
Vendimi i Gjykatës së Shkallës së Parë
Gjykata Komerciale – Dhoma e Shkallës së Parë, me Aktvendimin KPP.nr.2501/22 të datës 08.05.2023, aprovoi prapësimin e debitorit dhe e shfuqizoi urdhrin për përmbarim të lëshuar nga Përmbaruesi Privat. Ajo vlerësoi se dokumenti nuk përmban elementet bazë për të qenë titull ekzekutiv dhe për këtë arsye është i pavlefshëm për përmbarim.
Vlerësimi i Gjykatës së Shkallës së Dytë
Kreditori kishte ushtruar ankesë kundër këtij aktvendimi, mirëpo Gjykata Komerciale – Dhoma e Shkallës së Dytë me Aktvendimin K.Dh.Shk.II.nr. 888/2023, të datës 17.10.2023, e refuzoi ankesën si të pabazuar dhe e vërtetoi vendimin e shkallës së parë.
Gjykata theksoi se vendimit i mungon vula e klauzolës së formës së prerë dhe ajo e ekzekutueshmërisë, nuk ka datë të nxjerrjes, udhëzimi për këshillë juridike është i mangët, vendimi nuk përmban asnjë arsyetim, si dhe nuk është përcaktuar periudha kohore nga buron borxhi i pretenduar nga tatimpaguesi. Të gjitha këto e bëjnë dokumentin të papërshtatshëm për të shërbyer si bazë ligjore për përmbarim.
Vlerësim Ligjor
Kjo çështje konfirmon parimin themelor se çdo përmbarim duhet të mbështetet në një dokument të qartë, të arsyetuar dhe të plotësuar me elemente të formës së prerë. Çdo mangësi procedurale, përfshirë mungesën e klauzolës së përmbarueshmërisë dhe të periudhës së detyrimit, e bën dokumentin juridikisht të pavlefshëm për qëllime të ekzekutimit.
