IPK publikon raportin për përdorimin e radarëve nga Policia e Kosovës

Inspektorati Policor i Kosovës (IPK) ka publikuar një Raport të inspektimit të jashtëzakonshëm që lidhet me përdorimin e pajisjeve për matjen e shpejtësisë nga njësitë e Policisë së Kosovës. Inspektimi është ndërmarrë me kërkesë të Kryeshefit Ekzekutiv të IPK-së, pas dyshimeve për mosndëshkim të kundërvajtësve nga disa zyrtarë policorë.

Gjatë inspektimit, IPK është fokusuar në fushën e “Përdorimit të teknologjisë për matjen e shpejtësisë së lëvizjes së mjeteve në trafik”, ku janë identifikuar dobësi në mënyrën e pasqyrimit të të dhënave në gjoba krahasuar me shkeljet reale të evidentuara përmes radarëve.

Raporti evidenton katër lloje të mospërputhjeve ndërmjet të dhënave të radarëve dhe atyre në gjoba:

• Shpejtësia në gjobë më e ulët se ajo e regjistruar në radar (55 nga 84 gjoba);
• Shpejtësia e kufizuar e ndryshme në radar dhe në gjobë (23 raste);
• Lloji i shkeljes në gjobë i ndryshëm nga ajo e matur (3 raste);
• Gjobë e shqiptuar sipas nenit jo adekuat (3 raste).

IPK, si rezultat i këtyre gjetjeve, ka formuluar shtatë rekomandime për Policinë e Kosovës:

• Hartimi i një udhëzuesi për përdorimin e pajisjeve matëse të shpejtësisë;
• Mbajtja e trajnimeve shtesë për zyrtarët policorë;
• Kontrolle të brendshme për saktësinë e të dhënave të futura në pajisje;
• Eliminimi i praktikave të dëmshme gjatë shqiptimit të gjobave;
• Përdorimi efektiv i automjeteve me pajisje inteligjente për kontroll të trafikut;
• Monitorimi i shkarkimit dhe ruajtjes së materialeve të regjistruara;
• Zbatimi i praktikës së printimit të gjobave në momentin e shqiptimit.

IPK thekson rëndësinë e transparencës dhe saktësisë në procesin e shqiptimit të gjobave dhe thotë se zbatimi i këtyre rekomandimeve do të ndihmojë në rritjen e llogaridhënies dhe besimit të publikut në institucionet e rendit.