Gjyqtari Alajdin Tërshnjaku avancohet në Dhomat e Shkallës së Dytë të Gjykatës Komerciale
Prishtinë, 30 korrik 2025 – Këshilli Gjyqësor i Kosovës ka marrë vendim për avancimin e gjyqtarit Alajdin Tërshnjaku në Dhomat e Shkallës së Dytë të Gjykatës Komerciale, pas një periudhe të dalluar si gjyqtar në Dhomat e Shkallës së Parë.
Kryetari i Gjykatës Komerciale, Mahir Tutuli, përgëzoi gjyqtarin Tërshnjaku për këtë avancim të merituar, duke theksuar përkushtimin dhe profesionalizmin e tij të dëshmuar ndër vite. Ai gjithashtu shprehu gatishmërinë për thellim të bashkëpunimit me qëllim të rritjes së efikasitetit të gjykatës dhe përmirësimit të cilësisë në vendimmarrje.
“Ky avancim është një dëshmi e angazhimit të pandërprerë të gjyqtarit Tërshnjaku për drejtësi të pavarur, të paanshme dhe efikase”, u shpreh kryetari Tutuli në fjalën e tij.
Kolegët gjyqtarë dhe stafi administrativ i kanë uruar sukses gjyqtarit Tërshnjaku në rrugëtimin e tij të ri profesional. Ata e kanë cilësuar këtë avancim si një hap të rëndësishëm për zhvillimin e mëtejshëm të Gjykatës Komerciale.
Mandati i gjyqtarit Tërshnjaku në Dhomat e Shkallës së Dytë fillon zyrtarisht më 1 shtator 2025.
Për më shumë informata rreth strukturës dhe funksioneve të Gjykatës Komerciale, ju mund të vizitoni faqen zyrtare të Këshillit Gjyqësor të Kosovës.
