Arrestohen dy persona të dyshuar për vjedhje të rënda në institucione arsimore
Si rezultat i një hetimi intensiv dhe veprimeve të shpejta operative, Njësia e Hetimeve të Stacionit Policor në Viti ka arritur të identifikojë dhe të vërë në pranga dy persona të dyshuar për një seri vjedhjesh në institucione shkollore.
Të arrestuarit janë meshkuj kosovarë, M.J. (lindur në vitin 2002) dhe B.K. (lindur në vitin 2006). Ata dyshohen se në bashkëveprim kanë shënjestruar tri lokacione të institucioneve arsimore në komunën e Vitisë, duke përvetësuar pajisje me vlerë të konsiderueshme.
Pajisjet e konfiskuara:
Gjatë kontrolleve në dy lokacione të ndryshme, policia ka gjetur dhe konfiskuar dëshmi materiale që ndërlidhen me rastet, duke përfshirë:
- Laptopë dhe iPad
- Projektorë shkollorë
- Pajisje të tjera të teknologjisë
- Mjete të ndryshme pune
Kontrollet janë realizuar me urdhër të gjykatës kompetente, ku sendet e vjedhura janë verifikuar si pronë e institucioneve arsimore të dëmtuara.
Të dyshuarit janë intervistuar në prani të avokatëve të tyre mbrojtës. Me vendim të Prokurorit të Shtetit, ndaj tyre është caktuar masa e ndalimit për 48 orë, ndërsa procedurat ligjore po vazhdojnë për dokumentimin e plotë të rasteve.
