Gjykata Themelore në Prishtinë hedh aktakuzën ndaj Faton Klinakut për kanosje ndaj Kryeministrit
Gjykata Themelore në Prishtinë ka aprovuar kërkesën për hedhjen e aktakuzës ndaj Faton Klinakut dhe ka pushuar procedurën penale ndaj tij për veprën penale “Kanosja” ndaj Kryeministrit të Republikës së Kosovës, Albin Kurti. Procedura penale do të vazhdojë vetëm ndaj të akuzuarit tjetër, Nuredin Selmani.
Vendimi gjyqësor dhe rrjedha procedurale
Sipas aktvendimit të siguruar nga “Betimi për Drejtësi”, vendimi është nxjerrë më 20 nëntor 2025 nga kryetari i trupit gjykues, gjyqtari Rahman Beqiri, pas shqyrtimit të kundërshtimit të provave dhe kërkesës për hedhjen e aktakuzës të paraqitur nga mbrojtësi i Klinakut, avokati Ramë Dreshaj.
Në seancën fillestare të mbajtur më 3 shtator 2025, si Faton Klinaku ashtu edhe Nuredin Selmani ishin deklaruar të pafajshëm lidhur me akuzat e ngritura nga Prokuroria Speciale e Republikës së Kosovës.
Përmbajtja e akuzës ndaj Klinakut
Klinaku akuzohej se më 29 gusht 2023 kishte publikuar në rrjetin social Facebook një shkrim me përmbajtje kërcënuese, ku thuhej: “më parë e vras Albin Kurtin sesa që ia lëshoj rrugën e iku nga Kosova”.
Aktakuza e Prokurorisë Speciale e datës 1 gusht 2025 e ngarkonte Klinakun për veprën penale “Kanosja” nga neni 181 paragrafi 3 lidhur me paragrafin 2 të Kodit Penal të Republikës së Kosovës.
Arsyetimi juridik i Gjykatës
Gjykata ka vendosur që aktakuza të hidhet pjesërisht dhe procedura penale të pushohet vetëm në raport me Faton Klinakun, duke konstatuar se provat e administruara nuk përmbushin standardin e nevojshëm ligjor për vazhdimin e procedurës penale ndaj tij.
Po ashtu, Gjykata ka konstatuar se në këtë rast nuk është paraqitur kërkesë pasurore-juridike, ndërsa shpenzimet e procedurës penale që lidhen me këtë pjesë të aktakuzës do të mbulohen nga mjetet buxhetore të Gjykatës.
Procedura penale vazhdon ndaj Nuredin Selmanit
Në aktvendim theksohet se, pas plotfuqishmërisë së tij, procedura penale do të vazhdojë vetëm ndaj Nuredin Selmanit, i cili vazhdon të përballet me akuzën për veprën penale “Kanosja” sipas të njëjtit nen të Kodit Penal.
Selmani ngarkohet se kishte publikuar një fotografi të montuar me imazhin e të dëmtuarit Albin Kurti dhe Faton Klinakut, të shoqëruar me shkrime kërcënuese si: “E mbështes Faton Klinakun” dhe “Veç ni telefon ma ban Faton, aty mki për çka të ka nevojë, mezi s’po pres me ja nisë”.
Vendim i formës së prerë
Ndaj këtij aktvendimi të Gjykatës Themelore në Prishtinë nuk lejohet ankesë në Gjykatën e Apelit, duke e bërë vendimin për pushimin e procedurës ndaj Faton Klinakut të formës së prerë.
