Gjykata Kushtetuese konstatoi shkelje për tejzgjatje të procedurës në rastin KI81/25
Gjykata Kushtetuese e Republikës së Kosovës ka publikuar aktgjykimin në rastin KI81/25, të parashtruar nga Adem Shehu, përmes së cilit është kërkuar vlerësimi i kushtetutshmërisë së kohëzgjatjes së procedurave gjyqësore në lidhje me lëndën [T.nr.29/2000], të trajtuar nga Gjykata Themelore në Gjakovë.
Rrethanat faktike të rastit
Rasti ka të bëjë me një procedurë jokontestimore për ndarjen e trashëgimisë. Parashtruesi i kërkesës, më 7 nëntor 2000, kishte dorëzuar kërkesë për zbatimin e procedurës së trashëgimisë së lënë pas nga nëna e tij në Gjykatën Komunale në Gjakovë.
Më 1 shkurt 2002, përmes Aktvendimit [T.nr.29/2000], Gjykata Komunale kishte ndërprerë procedurën e trashëgimisë deri në përfundimin e dy procedurave kontestimore që ndërlidheshin me ngastrat kadastrale përkatëse. Kundër këtij aktvendimi, parashtruesi kishte ushtruar ankesë, e cila ishte refuzuar nga Gjykata e Qarkut në Pejë.
Nga shkresat e lëndës rezulton se procedura ka mbetur e ndërprerë që nga shkurti i vitit 2002, pa asnjë vendim përfundimtar lidhur me çështjen e trashëgimisë.
Pretendimet kushtetuese
Parashtruesi i kërkesës pretendoi se ndërprerja afatgjatë e procedurës nga Gjykata Themelore në Gjakovë ka cenuar të drejtën e tij për gjykim të drejtë dhe të paanshëm brenda një afati të arsyeshëm, të garantuar me nenin 31 të Kushtetutës dhe nenin 6 të Konventës Evropiane për të Drejtat e Njeriut.
Vlerësimi juridik i Gjykatës Kushtetuese
Në vlerësimin e saj, Gjykata Kushtetuese shtjelloi parimet e praktikës gjyqësore të Gjykatës Evropiane për të Drejtat e Njeriut, duke analizuar kriteret e arsyeshmërisë së kohëzgjatjes së procedurës, përfshirë kompleksitetin e rastit, sjelljen e palëve, sjelljen e autoriteteve shtetërore dhe rëndësinë e çështjes për parashtruesin.
Gjykata vlerësoi se ndërprerja shumëvjeçare e procedurës nuk ishte e justifikuar dhe se përgjegjësia për tejzgjatjen i atribuohet autoriteteve gjyqësore, duke konstatuar shkelje kushtetuese.
