Mbrojtja e Hashim Thaçit kërkon përfshirjen e Bislim Zyrapit në listën e dëshmitarëve
Zhvillime të reja në procesin gjyqësor ndaj ish-krerëve të UÇK-së
Mbrojtja e Hashim Thaçit i ka kërkuar trupit gjykues që të përfshijë Bislim Zyrapin në listën e dëshmitarëve në procesin gjyqësor ku Thaçi, Kadri Veseli, Rexhep Selimi dhe Jakup Krasniqi po akuzohen për krime lufte dhe krime kundër njerëzimit. Sipas mbrojtjes, Zyrapi konsiderohet dëshmitar kyç për periudhën e aktakuzës dhe për çështjet që Prokuroria i ka vlerësuar qendrore për rastin.
Mbrojtja thekson se dëshmia e tij ka potencialin të ndikojë drejtpërdrejt në rezultatin e çështjes, sidomos në disa pika të caktuara të akuzës. Më herët, ajo kishte kërkuar pranimin e pesë deklaratave të mëparshme të Zyrapit, por kjo ishte refuzuar nga paneli gjykues, ndërsa edhe ankesa në Apel kishte dështuar.
Kërkesa e mbrojtjes për shtimin e Zyrapit
Mbrojtja është thirrur në Rregullën 119 (5) të Rregullores për të kërkuar shtimin e Zyrapit si dëshmitar, ndërsa për deklaratat e tij është mbështetur në rregullat 153 dhe 138. Sipas parashtrimit, kërkesa ka për qëllim të tregojë qëndrueshmërinë e dëshmisë së tij, e jo të provojë veprimet e të akuzuarve.
Në argumentim thuhet se Zyrapi, që nga hyrja e tij në Kosovë në maj të vitit 1998, ka mbajtur pozita të rëndësishme në kuadër të UÇK-së – fillimisht si oficer për trajnim dhe profesionalizim në Drejtorinë e Operacioneve, më pas si drejtues i saj dhe në fund si Shef i Shtabit të Përgjithshëm.
Pse nuk ishte përfshirë më herët?
Mbrojtja ka sqaruar se Zyrapi nuk ishte shtuar më herët sepse që nga fillimi i procedurës ishte dëshmitar i Prokurorisë. Megjithatë, vendimi i Apelit se deklaratat e tij mund të paraqiten vetëm përmes rregullave 153–155 e ka detyruar mbrojtjen të kërkojë shtimin e tij në listë, në mungesë të marrëveshjes për pranim nga ZPS.
Përmbajtja e pesë deklaratave
Sipas mbrojtjes, pesë deklaratat e Zyrapit u parashtruan gjatë dëshmisë së tij në korrik të vitit 2024. Prokuroria kishte sugjeruar mundësinë që Zyrapi të thirrej si dëshmitar i mbrojtjes, në mënyrë që deklaratat të paraqiteshin sipas rregullës 153.
Mbrojtja argumenton se shtimi i tij nuk do të shkaktonte vonesa në proces, pasi kërkohet vetëm që dëshmia e tij të pranohet me shkrim. Sipas tyre, pranimi i këtyre deklaratave është i rëndësishëm për të vlerësuar konsistencën dhe besueshmërinë e tij.
Qëndrimi i mbrojtjes
Sipas dokumentit të dorëzuar, pranimi i deklaratave do t’i mundësonte panelit të gjykimit të ketë të gjitha informacionet e nevojshme për të vlerësuar peshën e provave të Zyrapit dhe ndikimin e tyre në çështje. Mbrojtja thekson se Zyrapi është dëshmitar i rëndësishëm për të gjitha palët dhe se plotësimi i provave të tij është në interes të drejtësisë.
