Gjykata Kushtetuese e Republikës së Kosovës
Vlerësim i kushtetutshmërisë së Aktvendimit Rev. nr. 22/2024 të Gjykatës Supreme
Gjykata Kushtetuese e Republikës së Kosovës, më 26 qershor 2025, ka vendosur lidhur me kërkesën KI121/24, për vlerësimin e kushtetutshmërisë së Aktvendimit të Gjykatës Supreme të Kosovës [Rev. nr. 22/2024], të datës 6 shkurt 2024.
Gjykata konstatoi njëzëri se: (i) kërkesa ishte e pranueshme dhe (ii) është shkelur neni 31 paragrafi 1 i Kushtetutës së Kosovës, në lidhje me nenin 6 paragrafi 1 të KEDNJ-së.
Rrethanat e rastit
Rasti lidhet me një kontest pune mes parashtruesit dhe BKS-së. Parashtruesi kishte lidhur kontratë për periudhë të caktuar nga 1 nëntori 2015 deri më 31 tetor 2016. Më pas, më 10 mars 2016, u njoftua për shkëputjen e kontratës përmes Vendimit nr. 332/16 të BKS-së.
Pas ankesës së bërë më 22 mars 2016, e cila nuk mori përgjigje, parashtruesi dorëzoi kërkesëpadi më 5 maj 2016. Gjykatat më të ulëta e pranuan kërkesën, por Gjykata Supreme e rrëzoi duke pretenduar se padia ishte jashtë afatit 30 ditor.
Parashtruesi iu drejtua Gjykatës Kushtetuese duke pretenduar shkeljen e së drejtës për qasje në gjykatë për shkak të mungesës së arsyetimit dhe interpretimit të gabuar të afateve ligjore.
Vlerësimi i Gjykatës
Gjykata Kushtetuese vlerësoi se parashtruesi ka vepruar brenda afatit ligjor dhe se vendimi i Gjykatës Supreme ka cenuar të drejtën e tij për qasje në gjykatë. Vendimi i Supremes nuk ishte në pajtueshmëri me nenin 31 të Kushtetutës dhe nenin 6 të KEDNJ-së.
Lloji i aktit: Aktgjykim
Shkelje: E drejta për gjykim të drejtë dhe të paanshëm
Procedura paraprake: Civile
